Муҳаммад Солиҳнинг сўнгги йилларда ёзган шеърларидан намуналар

Muhammad_Solih

                                            Бир одам чиқибди Ўзбекистонда

                                             Бир одам чиқибди Ўзбекистонда
                                             оқни «оқ» дер эмиш, «қора»ни қора,
                                             тўғрисини айтар ҳар ер, ҳар онда
                                             айтармиш ҳар  кимнинг юзига қараб!

                                             Не еса ҳалолдан ер эмиш фақат,
                                             асрармиш ҳаромдан қўл ва кўзини
                                             омонатга этмас эмиш хиёнат,
                                             мутлоқо тутармиш берган сўзини!

                                             Бу ғайри қилиғи учун одамни
                                             юртда ҳеч ким қилмас эмиш масхара,
                                             таъқиб этиб отган ҳар бир қадамин,
                                             бадарға этмасмиш уни ташқари!

                                             Қарор бераолмасдан турар гўёки
                                             сеҳрланган 30 миллион фуқаро:
                                             Бу одамни қатл этсинми… ёки
                                             десинми «оқ»ни оқ, «қора»ни қора!?

                                             1 сентябр 2013

                                                                  ***

                                                                Умид

                                             Ҳеч нимам йўқ хайир бобида,
                                             фақат чексиз пушаймоним бор,
                                             фақатгина ўз азобида
                                             қоврилаётган бир иймоним бор.

                                             Фақат мени яратган Эгам,
                                             афу этмоқ учун сўнгги он
                                             бир баҳона топади деган
                                             Роббим ҳақда ҳусни зоним бор!

                                             2014

                                                                 ***

                                                Қорақамиш хотираси

                                                                              Ойдинга

                                             Шоҳона уйимиз бор эди, эсла:
                                             20 метрди нари-бериси!
                                             Бетон девор аро бизга ҳавас-ла
                                             Қараб турар эди Илҳом Париси!

                                             Бир ажиб йўқсилдик, бир ажиб йўқсил,
                                             ҳар куни рўзадор эдик биз гўё.
                                             Бизга суйканарди мўлтираб,ўксиб,
                                             бизлар бир чақага олмаган дунё!

                                             Учиб кирган эдик иков ҳаётга
                                             Шундок сўл ёнимда порларди сиймонг!
                                             Гўё ўзларига қалб излаётган
                                             икки иймон эдик, иккита иймон!

                                             2014

                                                                 ***

                       Oйдинхоним ўлим тўшагида ётаркан тўкилган сатрлар

                                             “Ўлаяпман, алвидо» дединг…
                                             Йўқ, аслида мен ўлаяпман!
                                             Чунки сен дунём эдинг —
                                             мен дунёмдан айрилаяпман!

                                             4 ноябр 2014

                                                                 ***

                                                              Бугун

                                             Мозорингга кетдим, севгилим
                                             Мозоринг гулзор эди.
                                             Сўнгра уйга қайтдим сенсиз
                                             сенсиз уй мозор эди…

                                             20 декабр 2014

                                                                 ***

                                                            Умуртқа

                                             Ёшлигида бу кимса тўғрийди ғоят,
                                             кексайиб, янада тўғрироқ бўлди,
                                             чунки умуртқаси бўлган Шеърият
                                             умрининг сўнггида Шариат бўлди.

                                             2014

                                                                                                               Муҳаммад Солиҳ

Манба: uzxalqharakati.com

Добавить комментарий

Ваш e-mail не будет опубликован. Обязательные поля помечены *